საშობაო აღლუმი მიდელბურგში

საშობაო სამზადისი

ეს ქალაქი მიდელბურგია- ჩრდილოეთ ვირჯინიის ცხენების სამშობლო.
50 წელია მიდელბურგი ყოველწლიურ საშობაო აღლუმს მართავს.
ეს პატარა ქალაქი სანადიროდაც არაჩვეულებრივი ადგილია. მიდელბურგის მოსახლეობა ცხენებს აშენებს, შემდეგ კი ტყეში გარეულ მელიაზე სანადიროდ დადის.

„მეზობელი ქალაქებიდან ბევრი ჩამოდის . ისინი ქალაქის ტრადიციებს უდიდეს პატივს სცემენ “- ამბობს მიდელბურგის მკვიდრი.

მიდელბურგელები ძველ ტრადიციებში ცხენით ჯირითს და სტვირზე დაკვრას გულისმხობენ. თუმცა აქ ახლად დამკვიდრებული ტრადიციების მიმდევრებსაც ნახავთ: მაგალითად ბაიკერებს და მექსიკელ კოვბოებს.

„ჩვენ სწრაფად ცვალებად სამყაროში ვცხოვრობთ. მიდელბურგი კი ამ მხრივ განსხვავებულია “- ამბობს ტრიუ მეთიუ.

მეთიუ სპა სალონის გენერალური მენეჯერია. მისი თქმით, თუ მიდელბურგს ერთი დღე ეწვევით, ცხოვრების რიტმისგან დაისვენებთ:

„ჩვენი ქალაქი ერთი ნაბიჯით წარსულში დაგაბრუნებთ. შეგეძლებათ ღრმად ჩაისუნთქოთ და სულიერად მოდუნდეთ.“

ორგანიზატორების თქმით, ყოველწლიურად ცამეტ ათას ადამიანს ყოფნის იმის გამბედაობა, რომ ცივ ამინდში ჩამოვიდეს და აქაური სანახაობით დატკბეს:

„აქაურობა იმიტომ მომწონს, რომ მე თვითონ პატარა ქალაქიდან ვარ. მსიამოვნებს, როდესაც ადამიანები ერთამნეთთან ასე ახლოს ვართ“- ამბობს მიდელბურგის სტუმარი.

მიდელბურგში ამ დღეებში ცხენებსაც ძალზე ანებივრებენ:

„დილით დავბანეთ, ფაფარი დავვარცხნეთ. საზოგადოების წინაშე ჩვენი ცხენები ლამაზად უნდა წარსდგნენ,“- ამბობს ცხენების საჯინობოს მენეჯერი შერილ ჯორდანი.

შობის დროს მიდელბურგი უჩვეულოდ ლამაზია. ყოველწლიურად ქალაქს ათასობით ადამიანი სტუმრობს.