ამერიკის სახელმწიფო მდივანი, ენტონი ბლინკენი ისრაელშია. მან ქვეყნის ლიდერებს უთხრა, რომ ისრაელს აქვს შანსი მოიპოვოს არაბი მეზობლების კეთილგანწყობა, თუ პალესტინის სახელმწიფოს არსებობისთვის რეალურ გზას დასახავს.
7 ოქტომბრის თავდასხმის შემდეგ, ეს ბლინკენის მეოთხე ვიზიტია რეგიონში. ისრაელში ყოფნის დროს ბლინკენი აპირებს, რომ ქვეყნის მთავრობასთან ერთად განიხილოს ის, რაც მან იორდანიაში, ყატარში, არაბეთის გაერთიანებულ საემიროებში და საუდის არაბეთში მოისმინა.
ბლინკენი უკვე შეხვდა ქვეყნის პრემიერს, ბენიამინ ნეთანიაჰუს. ვიზიტისას ის ასევე გეგმავს, რომ სპეციალურად შექმნილი კაბინეტის წევრებსაც შეხვდეს. კაბინეტი მას შემდეგ შეიქმნა, რაც "ჰამასის" წევრებმა ისრაელზე, 7 ოქტომბერს, მოულოდნელი თავდასხმა განახორციელეს და 1,200-ზე მეტი ადამიანი მოკლეს.
ისრაელის მიერ წამოწყებულმა საპასუხო ომმა, ღაზაში, "ჰამასის" კონტროლირებადი ჯანდაცვის სამინისტროს ინფორმაციით, 23,000 პალესტინელის სიცოცხლე შეიწირა.
ასევე ნახეთ: ისრაელი ღაზაში მიწისქვეშა იარაღის საწარმოს აღმოჩენაზე საუბრობსისრაელის თავდასხმების გამო, გაეროს თქმით, ღაზის სექტორში უმძიმესი ჰუმანიტარული სიტუაციაა შექმნილი. მოსახლეობას არ აქვს სუფთა წყალზე, საკვებსა და მედიკამენტებზე წვდომა. ღაზის ოფიციალური პირების მიერ გავრცელებული ინფორმაციის თანახმად, დაღუპულთა უმეტესობა ქალები და ბავშვები არიან.
ბლინკენმა განაცხადა, რომ ის მაქსიმალურად ეცდება დაარწმუნოს ისრაელი მეტი გააკეთოს ღაზაში სამოქალაქო პირების უსაფრთხოებისთვის და ასევე დაუშვას დამატებითი ჰუმანიტარული დახმარება. გასულ ღამეს, ამერიკის პრეზიდენტმა, ჯო ბაიდენმა განაცხადა, რომ ვაშინგტონი ცდილობს დაარწმუნოს ნეთანიაჰუს მთავრობა, რომ ჯარების ნაწილის უკან გაყვანა დაიწყოს.
ბლინკენის მიმდინარე ვიტიზი ახლო აღმოსავლეთის რეგიონში გრძელვადიანი მშვიდობის მიღწევასა და ისრაელისა და პალესტინელების კონფლიქტის დასრულებაზეა ფოკუსირებული. არაბული ქვეყნების წარმომადგენლებთან შეხვედრის შემდეგ, ბლინკენმა თქვა, რომ ამ ქვეყნებს სურთ ისრაელთან კარგი ურთიერთობები, მხოლოდ იმ შემთხვევაში, თუ პალსეტინის სახელმწიფოც იარსებებს.