მექსიკაში უკრაინის საელჩომ ხელისუფლებას სთხოვა დააკავოს რუსეთის პრეზიდენტი ვლადიმირ პუტინი, თუ ის პრეზიდენტის ინაუგურაციას დაესწრება. მექსიკის არჩეული პრეზიდენტის, კლაუდია შეინბაუმის ინაუგურაცია, პირველ ოქტომბერს გაიმართება.
7 აგვისტოს გავრცელებულ განცხადებაში, უკრაინის საელჩო ამბობს, რომ კიევი „დარწმუნებულია, რომ მექსიკის მთავრობა შეასრულებს“ პუტინის დაკავების საერთაშორისო ორდერს. რუსეთის პრეზიდენტის დაკავების ორდერი, სისხლის სამართლის საერთაშორისო სასამართლომ, სავარაუდო ომის დანაშაულებისთვის, 2023 წლის მარტში გასცა.