გაეროს სირიის ქალაქებში გამომძიებლების გაგზავნა სურს

გაერთიანებული ერების ორგანიზაციის ჯგუფი სირიაში ჩავიდა ქვეყანაში ქიმიური იარაღის გამოყენების ბრალდების გამოძიების განხილვის მიზნით.

ქიმიური ნივთიერებების შვედი ექსპერტი აკე სელსტრომი და გაეროს განიარაღების ორგანიზაციის ხელმძღვანელი ანგელა კეინი დამასკოში სირიის ხელისუფლების მიწვევით დღეს ჩავიდნენ.

გაეროს სირიის რამდენიმე ქალაქში გამომძიებლების გაგზავნა სურს იმ ბრალდების საფუძვლის დასადგენად, რომლებიც ოპოზიციამ მთავრობას წაუყენა ქიმიური იარაღის გამოყენებასთან დაკავშირებით.

სირიის პრეზიდენტი ბაშარ ალ ასადი გაეროს ნებას რთავს მხოლოდ ალეპოში ჩაატაროს გამოძიება და სხვა ქალაქებში მოგზაურობის უფლებას არ აძლევს.