საყოველთაო ჯანდაცვის რეფორმა ხვალიდან ამოქმედდება

თეთრი სახლი ხვალიდან საყოველთაო ჯანდაცვის კანონის ამოქმედების დაწყებისთვის ემზადება, იმის მიუხედავად, რომ კონგრესის რესპუბლიკელები მისი გაჭიანურების, ან გაუქმებისთვის ბრძოლას აგრძელებენ. „ობამაქეარის“ სახელწოდებით ცნობილი ჯანდაცვის რეფორმა ძალაში 1 ოქტომბრის დილიდან შედის.

სამედიცინო დაწესებულებებში გამზადებულია ახალი, 3-გვერდიანი ფორმები, რომელსაც მთავრობის მიერ სუბსიდირებული სამედიცინო დაზღვევის მსურველები შეავსებენ. ჯანდაცვის რეფორმის ადმინისტრაციამ ფორმები საგანგებოდ გაამარტივა და შეამოკლა. კერძო სადაზღვევო პოლისების დიდი ნაწილი 17 გვერდიანია. რეფორმის განმარტებები, რომლებსაც კომენტარს ვიცე-პრეზიდენტი ჯო ბაიდენი და ჯანდაცვის დეპარტამენტის მდივანი კეტლინ სიბელიუსი უკეთებენ, ქვეყნის 29 წამყვან გაზეთში ქვეყნდება.