“საქართველოსთან ჩვენი თანამშრომლობის დიდი ნაწილი ამჟამად გადახედვის პროცესშია, მათ შორის, “ღირსეული პარტნიორის” წვრთნები და სხვა ჩართულობები, რაც ჩვენ გვაქვს საქართველოს მთავრობასთან”,- განაცხადა დღეს, სახელმწიფო დეპარტამენტში გამართულ ბრიფინგზე, მაიკ კარპენტერმა. პრეზიდენტ ბაიდენის სპეციალურმა თანაშემწემ და თეთრი სახლის ეროვნული უშიშროების საბჭოს ევროპის მიმართულების ხელმძღვანელმა, საქართველოს შესახებ, სახელმწიფო დეპარტამენტის უცხოური პრესის ცენტრში, ჟურნალისტის მიერ დასმული კითხვის პასუხად ისაუბრა.
კარპენტერის თქმით, თეთრ სახლში ხედავენ, რომ საქართველოს მთავრობამ საგარეო კურსი იცვალა: “ცხადია, რომ ბოლო რამდენიმე თვის განმავლობაში, სამწუხაროდ, საქართველოს მთავრობა არასწორი მიმართულებით წავიდა ევროატლანტიკური ინტეგრაციის პერსპექტივის თვალსაზრისით”.
ამერიკის მთავრობის მაღალჩინოსნის თქმით, ამერიკა დიდი ხანია მხარს უჭერს “საქართველოს სუვერენიტეტს, ტერიტორიულ მთლიანობას მის საერთაშორისოდ აღიარებულ საზღვრებში. ჩვენ მონაწილეობა მივიღეთ ჟენევის საერთაშორისო დისკუსიების 60-ზე მეტ რაუნდში, საქართველოს მხარდასაჭერად” და შესაბამისად, იმის ხილვა, რომ ქვეყანა დასავლურ ღირებულებებთან შეუსაბამო გადაწყვეტილებებს იღებს, “შეშფოთებას და გულისწყვეტას” იწვევს.
კარპენტერი განმარტავს, რომ “ქართული ოცნების” ხელისუფლების ქმედებები შეუსაბამოა ნატოსა და ევროკავშირის, ზოგადად, დასავლურ სტანდარტებთან.
“გულწრფელად რომ ვთქვათ, როდესაც ვხედავთ სამოქალაქო საზოგადოების შევიწროებას, როდესაც ვხედავთ მიღებულ კანონებს, რომლებიც ზღუდავს სივრცეს საქართველოში ფუნდამენტური თავისუფლებებისთვის, ეს არ არის თავსებადი იმ ღირებულებებთან, რომლებსაც ნატოს ალიანსი ემყარება. ასევე, არ მიგვაჩნია, რომ ის თავსებადია ევროატლანტიკურ სტრუქტურებთან, მათ შორის ევროკავშირთან. ასე რომ, ჩვენ ვიმედოვნებთ, რომ ვიხილავთ მიმართულების, სტრატეგიული მიმართულების ცვლილებას საქართველოს ხელისუფლების მხრიდან”, - განმარტავს თეთრი სახლის მაღალჩინოსანი.
კარპენტერის თქმით, იქამდე, სანამ საქართველი არ დაუბრუნდება დემოკრატიულ გზას და დასავლური სტანადრატების ნაბიჯებს არ გადადგამს, "ჩვენი [ამერიკის] ყველა პროგრამა საქართველოსთან გადახედვის პროცესშია”.
